الى روح أمتنا التي كانت عظيمة، رحمها الله وجعل الجنة مأواها، لعلها تفكر يوما أن تعود. ان خطر هذا على بالها، لا بد أن تنتفض من تحت التراب لتعلن عودتها عظيمة كما كانت:

ليه يا تور ف الساقية داير

Sayedattia

تور في ساقية ...

هوه داير ودايره بيه

إيد وحاطـــه ...

عَصبة سوده فوق عينيه

تور وحاير في دواير

دنيا دايره حواليه

كل نقطة ف الدواير

تبتدي وترجع إليه

كل ثانيه م الثوانى

تنتهى .. تبكي عليه

والسؤال دايماً يعافر

ألف إمتي وألف ليه ؟

ليه ياتور ف الساقيه داير

أنت واخد منها أيه ؟!!!

تور وشايل م الهموم .. كفة همــــــوم

تور وشايف عز ضهره.. النجــــــــوم

تور ودايق من سنين .. علقم ..سموم

يوم مايرحل عنه ظالم

تيجي وتزوره الغيوم

لما يحلم يوم بعَالـَم

حضنه دافي وحنون

يلقى يومه هم دايم

يزرع الشوك ف العيون

والسؤال دايماً يعافر

ألف إمتي وألف ليه ؟

ليه ياتور ف الساقيه داير

أنت واخد منها أيه ؟!!!

التيران في يوم وليله لما حسوا بالهـــــــوان

قرروا: نخرج مظاهرة .. أوح نعلن الاعتصام

منهم اللي قال كفايه .... منهم اللي كان جبان

ليه تغمض فينا عين .... كله ممنوع م الكلام

مهما كان التبن غالي مهما ضاق بينا المكان

كله ساكت غصب عنه كله مربوط باللجــــــام

مهما كنــتم ... مهما كــــــان

أخبطوا الروس ف الحيطان

عسكر الوالي الهمام

راح تهدهد الوريث علشان ينام

والسؤال دايماً يعافر

ألف إمتي وألف ليه ؟

ليه ياتور ف الساقيه داير

أنت واخد منها أيه ؟!!!

أسألوا حقي اللي ضايع ... ف المصانع

خصخصوها .... وخصخصوني

هوه فين خير المَزَراع ... يا مُزارع

نهبوها... ونهبوني

مية النيل الجميل ...والنسايم م المنابـع

لوثوها .... ولوثونى

فرحة الأم بوليد ... لهفة الأب اللي راجع

وأدوهــا .... و وأدونى

صرخة القلب الجريح ... اللي مليانه مواجع

كمموهــــا .... وكمموني

والسؤال دايماً يعافر

ألف إمتي وألف ليه ؟

ليه ياتور ف الساقيه داير

أنت واخد منها أيه ؟!!!